हेटौँडा । विजयादशमीको अवसर पारेर उपभोक्तालाई राहत पु¥याउने उद्देश्यले हेटौँडामा सुपथ मूल्य बजार सुरु गरिएको छ। मकवानपुर उद्योग वाणिज्य संघको व्यवस्थापन र मकवानपुर अधिकृत बिक्रेता व्यवसायी संघको संयोजनमा सञ्चालित बजारको उद्घाटन प्रमुख जिल्ला अधिकारी स्किम श्रेष्ठले गर्नुभयो।
बजार असोज ११ गतेसम्म पल्पसा सभागृहमा सञ्चालन हुनेछ। उपभोक्ताले दैनिक उपभोग्य खाद्यवस्तुहरू होलसेल मूल्यमा खरिद गर्न सक्ने व्यवस्था गरिएको छ। विभिन्न १५ वटा स्टलमार्फत तोरीको तेल, चिनी, पिठो लगायतका अत्यावश्यक खाद्यान्न र दैनिक प्रयोगका सामग्री सुपथ मूल्यमा उपलब्ध गराइनेछ।
उद्घाटन कार्यक्रममा बोल्दै प्रमुख जिल्ला अधिकारी श्रेष्ठले यस्तो बजारले चाडपर्वको समयमा हुने मूल्यवृद्धि नियन्त्रणमा योगदान गर्ने विश्वास व्यक्त गर्नुभयो। उहाँले मूल्य सूची स्पष्ट राख्न व्यवसायीहरूलाई आग्रह गर्दै पारदर्शी कारोबारको आवश्यकता औंल्याउनुभयो।
मकवानपुर उद्योग वाणिज्य संघका अध्यक्ष प्रमोद सिंह रानाभाट, संघका पूर्वअध्यक्षहरू, बोर्ड सदस्य तथा सल्लाहकारहरू कार्यक्रमको उपस्थितीमा रहनुभएको थियो।
