हेटौँडा । मकवानपुर प्रहरीले करिब चौतिस लाख रुपैयाँ बराबरको भन्सार छलि गरी ल्याइएका कपडाहरु र प्रतिबन्धित पटकाजन्य पदार्थहरू नियन्त्रणमा लिएको छ।
जिल्ला प्रहरी कार्यालय मकवानपुरबाट खटिएको प्रहरी टोलीले शुक्रबार बिहान करिब ४ः१० बजे हेटौँडा उपमहानगरपालिका–१५ रातोमाटेस्थित चार्जिङ स्टेशन अगाडि पूर्व–पश्चिम राजमार्गमा मधेश प्रदेश–०३–००१च ९०२३ नम्बरको योद्धा गाडी रोकी जाँच गर्दा उक्त सामान फेला परेको हो।
प्रहरीका अनुसार उक्त गाडी बिरगंजबाट हेटौँडातर्फ आइरहेको थियो। गाडी चालक रौतहट, बृन्दाबन नगरपालिका–९ का २० वर्षीय युवक र सहचालक गरुडा नगरपालिका–४ का ३१ वर्षीय युवकलाई नियन्त्रणमा लिइएको छ।
गाडीको पछाडिको ढालाभित्र लुकाइ–छिपाई ल्याइएका सामानमध्ये साडी १३० थान, कुर्ता ६९६ थान, टप्स १७५ थान गरी जम्मा १,००१ थान कपडा बरामद गरिएको छ, जसको मूल्य करिब १४ लाख रुपैयाँ बराबर रहेको प्रहरीले जनाएको छ।
त्यसैगरी, सोही स्थानबाट प्रतिबन्धित पटकाजन्य (झिरझिरे लगायतका) पदार्थहरू समेत करिब २० लाख रुपैयाँ बराबर फेला परेका छन्। पक्राउ परेका व्यक्तिहरू र बरामद सामग्री प्रहरीले नियन्त्रणमा लिएर थप अनुसन्धान अघि बढाएको जनाएको छ।
