मकवानपुर । नेपाललाई अन्तर्राष्ट्रिय स्तरमा पहिचान दिलाउन योगदान पुर्याउने तथा हेटौँडा शहरको परिकल्पना गर्ने स्विस नागरिक डा. टोनी हेगनको सम्झनामा निर्माण गरिएको डा. टोनी हेगन स्मृति पार्क उद्घाटन गरिएको छ।
हेटौँडा उपमहानगरपालिकाको सहयोगमा हेटौँडा-१०, टिसिएन क्षेत्रमा निर्मित यो स्मृति पार्कको उद्घाटन हेटौँडा उपमहानगरपालिकाका नगर प्रमुख मीनाकुमारी लामा, टोनी हेगन फाउन्डेसनका अध्यक्ष तथा हेगनकी छोरी डा. क्याट्रिन हेगन तथा पूर्व नगर प्रमुख हरीबहादुर महतले संयुक्त रूपमा गरेका हुन् ।
स्मृति पार्क हेटौँडा-१०, नेत्रज्योति टोलको १ बिगाहा ४ कठ्ठा १७ १/२ धुर क्षेत्रफलमा फैलिएको छ। पार्क निर्माणको गुरुयोजना अनुरुप थप संरचनाहरू विकास गर्ने काम जारी रहेको छ।
टोनी हेगन नेपालका लागि मात्र नभई सम्पूर्ण विश्वका लागि प्रेरणादायी व्यक्ति थिए। उनको योगदानको सम्मानमा निर्माण गरिएको यो पार्क हेटौँडाका बासिन्दा तथा पर्यटकका लागि आकर्षणको केन्द्र बन्ने अपेक्षा गरिएको छ।
