हेटौँडा । बागमती प्रदेशका मुख्यमन्त्री इन्द्रबहादुर बानियाँले व्यक्तिगत खर्चमार्फत मकवानपुरको मनहरी गाउँपालिका–९ की विपन्न दलित एकल महिला मिठुमाया सुनारका लागि घर निर्माण गरिदिने भएका छन्।
सोमबार मनहरी गाउँपालिकामा आयोजित कार्यक्रममा मुख्यमन्त्री बानियाँले गाउँपालिकामार्फत घर निर्माणका लागि २ लाख रुपैयाँको चेक हस्तान्तरण गर्नुभयो। पाँच वर्षअघि श्रीमानको मृत्यु भएकी मिठुमायाको एक मात्र छोरा अपाङ्ग रहेकाले उहाँ घर बनाउन नसकी समस्या भोग्दै आएकी थिइन्।
स्थानीय समाजसेवी र मनहरी गाउँपालिकाको सिफारिसका आधारमा सहयोग गरिएको हो। मुख्यमन्त्री बानियाँले यसअघि नै आफ्नो सेवा सुविधा खर्च विपन्न नागरिकको घर निर्माणमा प्रयोग गर्ने घोषणा गर्नुभएको थियो।
सो अवसरमा गाउँपालिका अध्यक्ष रन्जन कालाखेती, वडाध्यक्ष राजकुमार श्रेष्ठ, यादव थपलिया, समाजसेवी प्रकाश बर्तौला र मकवानपुर उद्योग वाणिज्य संघ पश्चिम क्षेत्र समितिका अध्यक्ष गणेश मानन्धरसहित स्थानीयको उपस्थितिमा चेक हस्तान्तरण गरिएको थियो।
सहयोग रकमबाट दुई कोठा, एक भान्छा र शौचालयसहितको घर निर्माण गरिने योजना बनाइएको छ।
