हेटौँडा । हेटौँडा उपमहानगरपालिका–११ मा सडक दुर्घटना न्यूनीकरण गर्ने उद्देश्यले ‘रोड मिरर’ (Road Mirror) जडान गरिएको छ। जिल्ला ट्राफिक प्रहरी कार्यालय मकवानपुरबाट प्राप्त तथ्यांकअनुसार, राप्ती पुलदेखि पश्चिम सरस्वती खोल्सीसम्मको क्षेत्रमा आर्थिक वर्ष २०८२/०८३ मा ९३ वटा सडक दुर्घटना भएका छन्। उक्त दुर्घटनाहरूमा परी १६३ जना घाइते, ७ जना गम्भीर घाइते र २ जनाको मृत्यु भएको छ।
पछिल्लो समय यस क्षेत्रमा सडक दुर्घटनाका कारण मानिसहरूको ज्यान जानु र अंगभंग हुनुका साथै गम्भीर घाइते हुनेको संख्या अत्यधिक देखिएपछि यसको नियन्त्रणका लागि सुरक्षात्मक पहल गरिएको हो। विशेष गरी राजमार्गका शाखा बाटोहरूबाट मुख्य सडकमा प्रवेश गर्दा दायाँबायाँबाट आउने सवारी साधनहरू नदेखिँदा हुने दुर्घटनालाई कम गर्न रोड मिररले महत्त्वपूर्ण भूमिका खेल्ने विश्वास लिइएको छ।
२०८३ असार २३ गते आयोजित कार्यक्रममार्फत उक्त रोड मिररहरूको उद्घाटन गरिएको छ। कार्यक्रममा जिल्ला प्रहरी कार्यालय मकवानपुरका प्रमुख प्रहरी उपरीक्षक श्यामबहादुर खत्री र जिल्ला ट्राफिक प्रहरी कार्यालय मकवानपुरका प्रमुख रमेश बिष्टलगायतको उपस्थिति रहेको थियो। यस कार्यका लागि सहयोग पुर्याउने सम्पूर्ण सरोकारवाला निकाय तथा व्यक्तित्वहरू प्रति आयोजकले आभार तथा धन्यवाद व्यक्त गरेको छ।
