हेटौँडा । हेटौँडा उपमहानगरपालिकाको सामाजिक विकास महाशाखाको आयोजनामा सामाजिक सुरक्षा तथा घटना दर्तासम्बन्धी एकदिने अन्तरक्रियात्मक कार्यक्रम सम्पन्न भएको छ। शुक्रबार सम्पन्न उक्त कार्यक्रममा सामाजिक सुरक्षा वितरण प्रणाली र व्यक्तिगत घटना दर्ता प्रक्रियालाई थप व्यवस्थित, पारदर्शी तथा सेवाग्राहीमैत्री बनाउने विषयमा केन्द्रित रहेर छलफल गरिएको थियो।
कार्यक्रममा सेवा प्रवाहका क्रममा फिल्ड स्तरमा देखिएका व्यावहारिक चुनौतीहरू, विद्यमान कानुनी व्यवस्थाहरूको प्रभावकारी कार्यान्वयन र सेवालाई चुस्त बनाउन आवश्यक पर्ने सुधारका उपायहरूबारे सरोकारवालाहरूबीच गहन विचार–विमर्श भएको थियो। उपमहानगरपालिकाले सामाजिक सुरक्षा भत्ता र जन्म, मृत्यु, विवाह, सम्बन्धविच्छेद तथा बसाइँसराइ दर्ता जस्ता महत्त्वपूर्ण घटना दर्ता कार्यलाई प्रविधिमैत्री र सहज बनाउन निरन्तर प्रयास गरिरहेको सन्दर्भमा यो कार्यक्रमले नीतिगत र व्यवहारिक पक्षलाई थप स्पष्ट पार्न मद्दत गरेको छ।
सेवाग्राहीले भोग्नुपरेका समस्याहरूलाई सम्बोधन गर्दै सामाजिक सुरक्षाको दायरामा रहेका लक्षित वर्गलाई सहज पहुँच सुनिश्चित गर्ने र घटना दर्ता प्रणालीलाई शून्य त्रुटिपूर्ण बनाउने विषयमा सहभागीहरूले आफ्ना धारणा राखेका थिए। कार्यक्रमले आगामी दिनमा पालिकाको सामाजिक सुरक्षा र दर्ता प्रणालीलाई थप प्रभावकारी बनाउन ठोस मार्गचित्र तय गर्ने अपेक्षा गरिएको छ।
