हेटौँडा ।नेपाल रेडक्रस सोसाइटी मकवानपुरले देशमा बाढीपहिरो र मौसमको प्रतिकूलताका कारण बिरामीहरूको संख्या बढेको र रगतको अभाव हुन लागेको जानकारी गराएको परिप्रेक्ष्यमा एक विशेष कार्यक्रम सम्पन्न भएको छ। नेपाल फर्निचर तथा फर्निसिङ व्यवसायी महासंघको १२औँ स्थापना दिवसको अवसर पारेर मकवानपुर फर्निचर व्यवसायी संघ र नेपाल फर्निचर तथा फर्निसिङ व्यवसायी महासंघ बागमती प्रदेशको संयुक्त आयोजनामा बृहत् रक्तदान तथा निःशुल्क मधुमेह परीक्षण कार्यक्रम गरिएको हो।
नेपाल रेडक्रस सोसाइटी मकवानपुर र हेटौँडा ल्याब हाउस एण्ड मल्टिस्पेसलिस्ट क्लिनिकको प्राविधिक सहयोगमा सञ्चालित उक्त कार्यक्रमको अध्यक्षता मकवानपुर फर्निचर व्यवसायी संघका अध्यक्ष हरिकुमार शर्मा र महासंघ बागमती प्रदेशका अध्यक्ष कृष्ण अर्यालले संयुक्त रूपमा गर्नुभएको थियो। कार्यक्रममा मकवानपुर उद्योग वाणिज्य संघका अध्यक्ष प्रमोदसिंह रानाभाट प्रमुख अतिथिका रूपमा उपस्थित हुनुहुन्थ्यो।
प्राविधिक सहयोग हेटौँडा ल्याब हाउस र रेडक्रस मकवानपुर रहेको यस कार्यक्रममा ३५ जनाले रक्तदान गरे भने करिब ६० जनाले मधुमेह परीक्षण गराए। कार्यक्रममा ६० पटकसम्म रक्तदान गर्ने नेपाल अडिटर्स संघका जिल्ला अध्यक्ष राजेन्द्र ढुंगाना र ३० पटकसम्म रक्तदान गरिसकेका फर्निचर व्यवसायी संघका बागमती प्रदेश अध्यक्ष कृष्णप्रसाद अर्याल लगायतले रक्तदान गरेका थिए।
