हेटौंडा । मकवानपुर जिल्लाबाट हालै चोरी भएका दुई वटा ट्रक चितवनको खैरहनी नगरपालिका–९ स्थित पूर्व–पश्चिम लोकमार्गको सडक किनारमा फेला परेका छन्।
जिल्ला प्रहरी कार्यालय मकवानपुरका अनुसार, ईश्वर बलामीले संचालन गर्दै आएका ना ३ ख ७३२० नम्बरको ट्रक गत २०८२ साल वैशाख ३० गते नवलपुरस्थित एक ग्यारेजमा पार्किङ गरी राखिएको अवस्थामा चोरी भएको थियो।
त्यस्तै, हरि बहादुर डंगोलको मे १ ख १४५७ नम्बरको ट्रक जेठ १ गते घर अगाडि पार्किङ गरिएको अवस्थामा हराएको थियो।
दुवै ट्रक हराएको सम्बन्धमा प्राप्त निवेदनको आधारमा गरिएको खोजतलासका क्रममा ट्रकहरू चितवनको खैरहनी नगरपालिका वडा नं. ९ मा सडकछेउ फेला पारिएको प्रहरीले जनाएको छ।
पक्राउ परेका ट्रकहरूलाई आज जेठ ३ गते जिल्ला प्रहरी कार्यालयमा बोलाइ धनीहरूले सनाखत गरी प्रमाणित गरेपछि सम्बन्धित ट्रकहरू फिर्ता दिइएको हो।
हाल चोरीमा संलग्न व्यक्तिहरूको खोजी कार्य जारी रहेको प्रहरीले जनाएको छ।
