मकवानपुर । हेटौँडामा आउँदो भदौ २४ गतेदेखि ३१ गतेसम्म ‘तेश्रो रोटरी मकवानपुर पिप्ले क्याम्पा राष्ट्रिय भेट्रान्स फुटबल प्रतियोगिता २०८१’ हुने भएको छ ।रोटरी क्लब अफ मकवानपुरले बुधबार पत्रकार सम्मेलन गरी प्रतियोगिता बारे जानकारी दिएको हो ।
हेटौंडा ५ स्थित पिप्ले क्याम्पा रंगशालामा प्रतियोगिता हुने रोटरी क्लब अफ मकवानपुरका संयोजक मोहन ढकालले जानकारी दिए। जलन प्राथमिक उपचार केन्द्रको निर्माण अभियानको लागि आर्थिक संकलन गर्ने उद्देश्यले प्रतियोगिता गर्न लागिएको संयोजक ढकालले बताए ।
८ दिनसम्म १५ वटा खेल हुने प्रतियोगिताको बिजेताले नगद २ लाख २ हजार र उपबिजेताले १ लाख १ हजार पुरस्कार पाउनेछ । त्यसैगरी विधागत तर्फ सर्वोकृष्ट हुने प्रशिक्षकलाई नगद १० हजार, उत्कृष्ट खेलाडी, गोलरक्षक, डिफेन्स, मिडफिल्डर र फरवार्डलाई जनही ५ हजारको दरले पुरस्कृत गरिने आयोजकले जनाएको छ । पिप्ले युवा क्लबको सहआयोजक र रोट्रयाक क्लब अफ मकवानपुरको सहकार्यमा हुन लागेको प्रतियोगिताको अनुमानित खर्च १६ लाख २८ हजार रहेको छ । यसअघि २०७२ सालमा भएको पहिलो संस्करण र २०७३ सालमा भएको दोश्रो संस्करणको उपाधि चितवन भेट्रान्स क्लबले जितेको थियो ।
