हेटौँडा । मकवानपुर उद्योग वाणिज्य संघको आतिथ्यतामा बुटवल उद्योग वाणिज्य संघको १९ सदस्यीय भ्रमण टोलीसँग मंगलबार अन्तर्क्रिया तथा छलफल कार्यक्रम सम्पन्न भएको छ।
बुटवल उद्योग वाणिज्य संघका अध्यक्ष हरिप्रसाद अर्यालको नेतृत्वमा हेटौँडा आएको उक्त टोलीलाई मकवानपुर उद्योग वाणिज्य संघका कार्यवाहक अध्यक्ष दीपक उप्रेतीले स्वागत गर्नुभयो। कार्यक्रममा कार्यवाहक अध्यक्ष उप्रेतीले मकवानपुर उद्योग वाणिज्य संघको स्थापना, संस्थाको संगठनात्मक स्वरूप, सदस्यता विस्तार र संघद्वारा सञ्चालित विभिन्न व्यावसायिक गतिविधिहरूबारे प्रकाश पार्नुभएको थियो।
छलफलका क्रममा बुटवल उद्योग वाणिज्य संघका अध्यक्ष हरिप्रसाद अर्यालले उद्योग वाणिज्य संघहरूबीचको अनुभव आदान-प्रदानले व्यावसायिक विकासमा महत्त्वपूर्ण भूमिका खेल्ने बताउनुभयो। उहाँले रुपन्देहीबाट पूर्वतर्फका अग्रणी संघहरूको अध्ययन भ्रमणमा निस्केको जानकारी दिँदै मकवानपुर उद्योग वाणिज्य संघको महिला उद्यमी विकास समितिको सक्रियता अन्य संघका लागि पनि अनुकरणीय र प्रेरणादायी रहेको बताउनुभयो। साथै, उहाँले बुटवल उद्योग वाणिज्य संघ शिक्षा र स्वास्थ्य क्षेत्रको विकासमा पनि उत्तिकै सक्रिय रहेको जानकारी दिनुभयो।
कार्यक्रममा मकवानपुर उद्योग वाणिज्य संघकी महासचिव प्रतिमा श्रेष्ठ, कोषाध्यक्ष तेजराज अधिकारी र कार्यसमिति सदस्य तथा महिला उद्यमी विकास समितिका सभापति सीतादेवी भेटवाल लगायतले मन्तव्य राख्दै संघका असल अभ्यासहरू र चुनौतीबारे विचार व्यक्त गर्नुभएको थियो। कार्यक्रममा बुटवल उद्योग वाणिज्य संघका प्रतिनिधिहरूको पनि सहभागिता थियो।
