हेटौंडा/मनहरी गाउँपालिकास्थित भूमि अधिकार मञ्चले नेकपा (मकवानपुर क्षेत्र नम्बर २) का प्रतिनिधिसभा उम्मेदवार लवशेर बिष्टलाई लालपुर्जा नपाएको विषयमा ध्यानाकर्षण पत्र बुझाएको छ।
पुस्तौंदेखि जोतभोग गर्दै आएको जग्गा बफर जोन तथा आरक्षण क्षेत्रभित्र पर्ने भन्दै हालसम्म नापी नभएको र त्यसका कारण समस्या उत्पन्न भएको मञ्चले जनाएको छ। भूमिहीन दलित, भूमिहीन सुकुम्बासी तथा अव्यवस्थित बसोबासीहरूको समस्या समाधान हुन नसकेको भन्दै हालसम्मका सरकारले गरिबमाथि थिचोमिचो गरेको आरोप पनि मञ्चले लगाएको छ। अब बन्ने सरकारले मनहरीवासीको समस्या समाधानका लागि पहल गर्नुपर्ने मागसहित ध्यानाकर्षण पत्र बुझाइएको मनहरी गाउँपालिका मञ्चका अध्यक्ष सूर्यबहादुर सापकोटाले जानकारी दिए।
मञ्चले बुझाएको भूमि सम्बन्धी ध्यानाकर्षण पत्रलाई आत्मसात गर्दै उम्मेदवार बिष्टले आफू निर्वाचित भएपछि मनहरीको भूमि समस्यालाई पहिलो प्राथमिकतामा राखेर उठान गर्ने प्रतिबद्धता व्यक्त गरे। उत्तरी मकवानपुरस्थित थाहा नगरपालिकाका निवर्तमान मेयरसमेत रहेका बिष्टले आफूले काम गरेर सबैको मन जितेको दाबी गरे। मेयर हुँदा जनताको काम गरेको उल्लेख गर्दै उनले मत किन्ने वा पैसाको बलमा चुनाव जित्ने कुरामा विश्वास नगर्ने बताए।
मनहरी गाउँपालिका–९, ज्यामिरेमा आयोजित कार्यक्रममा मनहरी गाउँपालिका भूमि अधिकार मञ्चका अध्यक्ष सूर्यबहादुर सापकोटा तथा जिल्ला भूमि अधिकार मञ्चका अध्यक्ष देवकृष्ण थोकरले उम्मेदवार बिष्टलाई ध्यानाकर्षण पत्र हस्तान्तरण गरेका हुन्। कार्यक्रम नेकपा मनहरी गाउँपालिका–९ का वडाध्यक्ष सोलाल गोलेको सभाध्यक्षतामा सम्पन्न भएको थियो।
