मकवानपुर । मकवानपुरका कैलाश गाउँपालिका र राक्सिराङ गाउँपालिकाले क्रीसमस पर्वको अवसरमा तीन दिन सार्वजनिक बिदा दिने निर्णय गरेका छन् ।
सबै भाषा, धर्म र संस्कृतिको संरक्षण गर्नु राज्य तथा स्थानीय सरकारको कर्तव्य भएको कैलाश गाउँपालिका अध्यक्ष लोक मुक्तान र राक्सिराङ गाउँपालिका अध्यक्ष राजकुमार मल्लको साझा धारणा रहँदै आएको छ । सोही मान्यतालाई आत्मसात गर्दै दुवै गाउँपालिकाले क्रीस्चियन समुदायको महत्वपूर्ण पर्व क्रीसमसका अवसरमा बिदा दिने निर्णय गरेका हुन् ।
कैलाश गाउँपालिका अध्यक्ष लोक मुक्तानले सबै धर्म र संस्कृतिको जगेर्ना गर्नु स्थानीय सरकारको दायित्व भएको बताए । दुवै गाउँपालिकाले देश तथा विदेशमा रहेका नेपाली क्रीस्चियन धर्मावलम्बीहरूलाई सुख, शान्ति, सुस्वास्थ्य, दीर्घायु, प्रगति र उन्नतिको कामना गर्दै क्रीसमसको शुभकामना पनि व्यक्त गरेका छन् ।
विश्वभर नेपाली महिना पुस १० गते अर्थात् अंग्रेजी महिना डिसेम्बर २५ तारिखका दिन येशु ख्रीष्टको जन्मदिनको रूपमा क्रीसमस डे मनाइन्छ ।
