हेटौंडा / हेटौंडा उपमहानगरपालिका–४ नम्बर वडास्थित एक क्याफेमा रातभरि अश्लील शब्द प्रयोग गर्दै हो–हल्ला भएपछि स्थानीयवासी समस्यामा परेका छन्।
हुप्रचौरको पूर्वी गेट नजिकै रहेको उक्त क्याफेमा रातभरि ठूलो स्वरमा अश्लील शब्द प्रयोग गर्दै हो–हल्ला गरिने गरेको स्थानीयको गुनासो छ। “रातभरि सुत्नै सकिनँ, बिहान ४ बजे मात्रै निदाउन पाएँ,” एक स्थानीयले मिडियासँग दुःखेसो पोखे।
स्थानीयका अनुसार होटल, रेस्टुरेन्ट, बार तथा डान्सबार सञ्चालन गर्नु व्यवसायिक अधिकार भए पनि वरपर बसोबास गर्ने मानिसहरू कामबाट थाकेर घर फर्किने गर्छन्। यस्तो अवस्थामा अरूलाई असहज हुने गरी असभ्य व्यवहार गर्नु व्यक्तिगत अधिकारको हनन भएको उनीहरूको भनाइ छ। एक–दुई पटक मात्र नभई पटक–पटक यस्ता गतिविधि दोहोरिँदै आएको स्थानीयले बताएका छन्।
प्रशासनमा पटक–पटक हारगुहार गर्दा पनि कुनै सुनुवाइ नभएको स्थानीयको गुनासो छ। “व्यवसाय सञ्चालन गर्ने समय कति बजेसम्म हो ?” भन्दै उनीहरूले प्रश्न उठाएका छन्।
स्थानीयले प्रशासनसँग बस्ती क्षेत्रको हितलाई ध्यानमा राख्दै रात्रीकालीन गस्ती बढाउन वा यस्ता व्यवसायहरू बस्तीभन्दा टाढा सार्न माग गरेका छन्।
