हेटौंडा । सीप विकास, दक्षता अभिवृद्धि र स्वदेशमै रोजगारीको सम्भावनालाई उजागर गर्ने उद्देश्यसहित हेटौंडामा दुई दिने ‘सीप महोत्सव २०८२’ आयोजना हुने भएको छ। बागमती प्रदेश उद्योग परिषद् र सामाजिक विकास मन्त्रालयको संयुक्त आयोजनामा असार १२ र १३ गते महोत्सव सम्पन्न हुने शनिबार आयोजित पत्रकार सम्मेलनमा जानकारी गराइएको हो।
महोत्सवबारे जानकारी दिँदै बागमती प्रदेश उद्योग परिसंघका अध्यक्ष लेखराज पोखरेलले दक्ष जनशक्ति उत्पादन, उत्पादन भएका जनशक्तिलाई रोजगारको अवसरसँग जोड्न र स्वदेशमै रोजगारी सम्भव छ भन्ने सन्देश दिन महोत्सवको आयोजना गरिएको बताए। महोत्सवले सीप, दक्षता र अनुभवको आदानप्रदान गर्दै प्राविधिक शिक्षा र उद्योग क्षेत्रबीचको सहकार्यलाई मजबुत पार्ने विश्वास पोखरेलले व्यक्त गरे।
सीप महोत्सवमा बागमती प्रदेश स्तरीय सीप प्रतियोगिता, विद्यार्थी तथा युवाका लागि अभिमुखीकरण कार्यक्रम, विभिन्न विधामा सीप सिकाइ र प्रदर्शन, साथै उद्योग भ्रमण जस्ता कार्यक्रमहरू समावेश गरिने छन्। यस महोत्सवलाई निजी क्षेत्र, सरकार, प्राविधिक शिक्षालय र उद्योग क्षेत्रबीचको सहकार्यको प्रतीकको रूपमा लिइएको आयोजकले जनाएको छ।
महोत्सवमा मकवानपुर, चितवन, काठमाडौं र काभ्रेपलाञ्चोक जिल्लाका १८ वटा अप्रेन्टिसीप कार्यक्रम सञ्चालन गरिरहेका शिक्षालयहरूमध्ये सूचना प्रविधि, अटोमोबाइल र होटल व्यवस्थापन विषय पढाइ हुने ९ वटा शिक्षालयबाट प्रतिस्पर्धी सहभागी गराइनेछ। हरेक शिक्षालयबाट प्रथम र द्वितीय हुने प्रतियोगीलाई प्रशंसापत्र प्रदान गरिने पनि आयोजकले जानकारी दिएको छ।
पूर्व बाल विकास सहजकर्ता तालिम, इलेक्ट्रिकल विधामा लाइभ प्रशिक्षण र करिब एक हजारभन्दा बढी विद्यार्थी तथा युवाहरूका लागि साइकोमेट्रिक परीक्षण महोत्सवका मुख्य आकर्षण हुनेछन्। आयोजकका अनुसार महोत्सवमा तीन हजारदेखि पाँच हजार जनासम्मले अवलोकन गर्ने अनुमान गरिएको छ।
