मकवानपुर । भारतको ओडिशा स्थित किट (KIIT) विश्वविद्यालयको छात्रावासमा रुपन्देहीका एक नेपाली विद्यार्थीको शंकास्पद मृत्यु भएको घटनाले नेपाली समुदायमा गहिरो शोक छाएको छ। मृतक विद्यार्थीका परिवार, साथीहरू तथा नेपालका विभिन्न क्षेत्रबाट घटनाको निष्पक्ष छानबिनको माग उठिरहेको छ।
पूर्व प्रधानमन्त्री तथा वरिष्ठ नेता झलनाथ खनालले सामाजिक सञ्जालमार्फत उक्त घटनामा गहिरो दुःख व्यक्त गर्दै नेपाल सरकारलाई नेपाली विद्यार्थीहरूको सुरक्षा र सम्मान सुनिश्चित गर्न आग्रह गरेका छन्। खनालले विश्व विद्यालय प्रशासनलाई घटनाबारे स्पष्ट जानकारी दिन, दोषीमाथि कारबाही गर्न र नेपाल सरकारलाई आवश्यक पहल गर्न अनुरोध गरेका छन्।
उनले विदेशमा अध्ययनरत नेपाली विद्यार्थीहरूका सुरक्षासम्बन्धी विषयलाई गम्भीरताका साथ लिनुपर्ने भन्दै दुवै देशका सरकारबीच उच्चस्तरीय संवाद हुनुपर्नेमा जोड दिए। साथै, नेपाल सरकारले सम्बन्धित निकायहरूसँग समन्वय गरी यस्ता घटनाबाट नेपाली विद्यार्थीहरू पीडित नबनोस् भनेर आवश्यक कदम चाल्नुपर्ने खनालले बताएका छन्।
नेपाल सरकार, विश्वविद्यालय प्रशासन तथा भारतीय अधिकारीहरूले यस घटनामा गहिरो अनुसन्धान गरी सत्यतथ्य बाहिर ल्याउने अपेक्षा गरिएको छ। साथै, विदेशमा अध्ययन गर्ने नेपाली विद्यार्थीहरूको सुरक्षाका लागि कूटनीतिक तहबाट पहल गर्नुपर्ने आवाज समेत उठिरहेको छ। हेर्नुहोस्–
