Day: २०८१ श्रावण २४, बिहीबार १३:५२ गते

मकवानपुर । मकवानपुरगढी गाउँपालिकाले गाउँपालिकाका विभिन्न विद्यालयमा अध्ययनरत ४ छात्राहरुलाई ल्यापटप उपहार दिएको छ । गाउँपालिकाको तर्फबाट उक्त विद्यार्थीहरुको अध्ययनलाई सहयोग पुग्ने गरि ल्यापटप वितरण गरिएको गाउँपालिकाकी उपप्रमुख मानकुमारी पाख्रिनले जानकारी दिईन्। गाउँपालिकाले श्री भानु माध्यमिक विद्यालयबाट एसईईमा उत्कृष्ट अंक ल्याएकी खुशी योन्जन र श्री चण्डिका माध्यमिक विद्यालयकी रस्मिता बिकलाई ल्यापटप प्रदान गरेको हो । त्यस्तै कक्षा १२ को परिक्षामा उत्कृष्ट अंक ल्याएका श्री शारदा माध्यमिक विद्यालयकी तिर्थमाया गोले र शारदा माविकै सन्ध्या बिकलाई पनि ल्यापटप उपहार दिइएको छ । गाउँपालिकाले दलित तथा जनजाति प्रोत्साहन लक्षित कार्यक्रमअन्तर्गत उक्त ल्यापटप वितरण गरेको हो ।

मकवानपुर । हेटौंडा उपमहानगरपालिका वडा नम्बर १३ पदमपोखरीमा रहेको महेन्द्र माध्यमिक विद्यालयका विद्यार्थीहरुलाई सम्मान, स्वागत तथा बिदाई गरिएको छ । विद्यालयले सम्मान, स्वागत तथा बिदाई कार्यक्रमको आयोजना गरेको हो । वि.सं. २०८० को एसईई तथा १० जोड २ परिक्षामा उत्कृष्ट अंकसहित उतिर्ण भएका विद्यार्थीहरुलाई स्वागत तथा बिदाई कार्यक्रम गरिएको हो । बुधबार विद्यालय परिसरमा आयोजित कार्यक्रममा हेटौंडा उपमहानगरपालिकाकी नगर प्रमुख मीनाकुमारी लामाले विद्यार्थीहरुलाई सम्मान गरेकी थिईन् । हेटौँडा १३ का वडा अध्यक्ष पेम्बा लामाको समेत आतिथ्यता रहेको कार्यक्रममा नेकपा एकिकृत समाजवादी हेटौँडा नगर अध्यक्ष विष्णुमाया लामाका साथमा अन्य सामाजिक व्यक्तित्वहरुको आतिथ्यता रहेको थियो ।