हेटौँडा । नेकपा एमाले का हेटौँडा उपमहानगरपालिका–११ का वडा सचिव विष्णुप्रसाद आचार्यले पार्टी परित्याग गरेका छन्। उनले सामाजिक सञ्जाल फेसबुकमार्फत स्टाटस लेख्दै पार्टीसँगको आफ्नो आबद्धता अन्त्य गरेको घोषणा गरेका हुन्।
आचार्यले लामो समयदेखि पार्टीमा विभिन्न जिम्मेवारी सम्हाल्दै आएको उल्लेख गरेका छन्। उनका अनुसार २०४५ सालदेखि विद्यार्थी राजनीतिबाट सुरु भएको उनको राजनीतिक यात्रा अनेरास्ववियु हुँदै जिल्लास्तरका विभिन्न पदहरूमा सक्रिय रहँदै अगाडि बढेको थियो। उनले वडा कमिटी सचिव, संगठित सदस्य तथा विभिन्न संगठनमा जिम्मेवारी निर्वाह गर्दै आएका थिए।
२०७२ सालदेखि हेटौँडा–११ मा बसोबास गर्दै आएका आचार्यले २०७९/०८० मा वडा कमिटी सचिवको जिम्मेवारी सम्हालेका थिए। साथै, उनी भूमि अधिकार श्रमिक संगठनको जिल्ला कमिटी सचिव पदमा समेत कार्यरत थिए।
तर पछिल्लो समय व्यक्तिगत व्यस्तताका कारण करिब १८ महिनादेखि निष्क्रिय रहँदै आएको उल्लेख गर्दै उनले आजको मितिबाट पार्टी र सोसँग सम्बद्ध सबै कमिटी तथा साधारण सदस्यता समेत त्यागेको बताएका छन्।
आचार्यले आफ्नो निर्णय व्यक्तिगत भएको उल्लेख गर्दै यसबारे नकारात्मक टिप्पणी नगर्न सबैलाई अनुरोध गरेका छन्।
