Day: २०८२ जेष्ठ २८, बुधबार २१:४३ गते

हेटौंडा । हेटौंडा उपमहानगरपालिका ११ नम्बर वडास्थित सिमलटारमा ढाका, मलमलको कपडाको जुत्ता बनाउने तालिमको उद्घाटन गरिएको छ । सिमलटार टोल विकास संस्थाको आयोजना र हेटौंडा ११ नम्बर वडाको आर्थिक सहयोगमा आयोजित ७ दिने तालिमको उद्घाटन वडाध्यक्ष जुना दाहालले गरेकी हुन् । तालिममा २० जना महिलाहरुको सहभागिता रहेको सिमलटार टोल विकास संस्थाका अध्यक्ष देवकृष्ण थोकरले जानकारी दिए । तालिम उद्घाटनमा वडा सदस्य सन्जय बिडारी, तालिमका प्रशिक्षक मीना सुवेदी, वडा समन्वय समितिका अध्यक्ष यज्ञबहादुर आचार्य, सिमलटार टोविस सल्लाहकार प्रभाकर पुडासैनी, उमेश बस्नेत लगायतकाको आतिथ्यता रहेको थियो ।

हेटौंडा । हेटौंडा उपमहानगरपालिकाको आयोजनामा 'संघीय संरचनामा स्थानीय सरकार र हेटौंडाको विकास' विषयक अन्तरक्रिया कार्यक्रम सम्पन्न भएको छ। कार्यक्रमको उद्घाटन बागमती प्रदेशका मुख्यमन्त्री बहादुरसिंह लामाले गरेका हुन्। मुख्यमन्त्री लामाले संघीय संरचनामा स्थानीय सरकारहरूको भूमिका अझ प्रभावकारी बनाउन यस्ता अन्तरक्रिया कार्यक्रम महत्वपूर्ण हुने बताए। उनले हेटौंडाको समग्र विकासका लागि प्रदेश सरकार प्रतिबद्ध रहेको उल्लेख गर्दै समन्वयात्मक कार्यशैली आवश्यक रहेको धारणा राखे। कार्यक्रममा विभिन्न क्षेत्रका प्रतिनिधि, जनप्रतिनिधि, सरकारी कर्मचारी, सञ्चारकर्मी तथा सरोकारवाला निकायका व्यक्तिहरूको उपस्थिति रहेको थियो। सहभागीहरूले संघीयताको कार्यान्वयन, स्थानीय तहको अधिकार प्रयोग, बजेट व्यवस्थापन, पूर्वाधार विकासलगायत विषयमा आफ्ना धारणा प्रस्तुत गरेका थिए।