मकवानपुर । बागमती प्रदेशका मुख्यमन्त्री बहादुर सिंह लामाले ठुला राजनीतिक परिवर्तनहरुमा सञ्चारजगतको ठुलो भुमिका रहेको बताउनुभएको छ ।
रेडियो मकवानपुरको १५ औं वार्षिकोत्सवको अवसरमा आयोजित सप्ताहव्यापी कार्यक्रमको समापन तथा पुरस्कार र सम्मान वितरण कार्यक्रममा बोल्नुहुँदै उहाँले दुरदराजमा रहेका जनतालाई निर्वाचन र आन्दोलनको बारे सुसचित गराउन रेडियोले ठुलो भुमिका खेलेको बताउनुभयो ।
कार्यपालिका, व्यवस्थापिका र न्यायपालिका पछि सञ्चारजगत प्रजातन्त्रको महत्वपूर्ण सम्पत्ति भएको उहाँको भनाई छ । मुख्यमन्त्री लामाले प्रविधिमा भएको विकासले सञ्चार क्षेत्रमा ठुलो चुनौती थपिएको जिकिर गर्नुभयो । सत्य तथ्यबुझी कसैप्रति पूर्वाग्रह नगखी समाचारहरु सम्प्रेषण गर्न पनि उहाँले आग्रह गर्नुभयो ।
कार्यक्रममा रेडियो मकवानपुरले सामुदायिक सम्मान २०८१ बाट २ जनालाई सम्मानित गरेको छ । नगद १० हजार राशी सहित अमर माध्यमिक विद्यालयका प्रध्यानाध्यापक मालती उप्रेती र सगरमाथा आरोहण गर्ने मकवानपुरकै पहिलो सगरमाथा आरोही बकैया ४ का बिक्रम कार्कीलाई सम्मान गरिएको हो ।
