मकवानपुर । बडादशैँ २०८२ को अवसरमा बागमती प्रदेश प्रमुख दीपक प्रसाद देवकोटाले शुभकामना सन्देश जारी गर्दै सबैमा शान्ति, सहकार्य र समृद्धिको कामना गरेका छन्।
सन्देशमा उनले दशैंलाई केवल पर्व मात्र नभई असत्यमाथि सत्यको विजय, अन्यायमाथि न्यायको स्थापना र अन्धकारमाथि प्रकाशको उदयको प्रेरणादायी शक्ति भएको उल्लेख गरेका छन्। “दशैं शक्तिको जागरण र आत्मबलको प्रतीक हो, जसले दृढ निश्चय, धैर्य र न्यायको रक्षा गर्ने अटल भाव जगाउँछ,” उनले भनेका छन्।
फूलपातीदेखि विजयादशमीसम्मको यात्रा नेपाली समाजलाई आस्था, संस्कार र एकताको धरोहरमा बाँध्ने कार्य गरेको बताउँदै उनले यस पर्वले सत्य, धर्म र न्यायको विजयलाई उजागर गर्दै समाजमा शान्ति र सहअस्तित्वको ज्योति फैलाउने विश्वास व्यक्त गरेका छन्।
हालैका आन्दोलन, जनधनको क्षति र देशको रुपान्तरण प्रक्रियाले आम नागरिकमा उल्लास घटाएको उल्लेख गर्दै उनले दशैंको मुखमा यात्रुहरूले ठूलो सास्ती व्यहोर्नु परेको अवस्थाप्रति चिन्ता व्यक्त गरेका छन्। यद्यपि यो पर्वले शान्ति, स्थिरता र समृद्धिको ढोका खोल्ने आशा दिलाउने विश्वास उनले व्यक्त गरेका छन्।
“यस महान् पर्वले नागरिकबीच आपसी सद्भाव, भ्रातृत्व र सहअस्तित्वलाई अझ सुदृढ बनाओस्, हरेक घर–घरमा सुख, शान्ति र समृद्धिको आशीर्वाद पुग्दै हाम्रो समाजलाई सभ्य, प्रगतिशील र समृद्धिको दिशातर्फ अघि बढाउन सघाओस् भन्ने मेरो हार्दिक शुभेच्छा रहेको छ,” उनले भनेका छन्।
साथै, उनले पर्वमा तडकभडक र फजुल खर्च नगरी गच्छेअनुसार मनाउन पनि आग्रह गरेका छन्।
