Day: २०८२ बैशाख १६, मंगलवार २०:५६ गते

हेटौंडा । मकवानपुरको हेटौंडा उपमहानगरपालिका वडा नं. ११ थानाभर्याङस्थित एक घरबाट लागूपदार्थसहित एक व्यक्ति पक्राउ परेका छन्। जिल्ला प्रहरी कार्यालय मकवानपुरबाट खटिएको प्रहरी टोलीले विशेष सूचनाको आधारमा ठाकुर सिँ मोक्तानको घरमा छापा मारेर उक्त परिमाणमा लागूपदार्थ बरामद गरेको हो। प्रहरीका अनुसार खानतलासीको क्रममा मोक्तानको शयनकक्षमा रहेको खाटमुनि लुकाइराखिएको अवस्थामा ३ किलो ८६० ग्राम अफिम जस्तो देखिने गिलो पदार्थ फेला परेको थियो। पदार्थ परीक्षणका लागि प्रयोगशालामा पठाइएको छ। प्रहरीले मोक्तानलाई घटनास्थलबाट नियन्त्रणमा लिई लागूपदार्थ सम्बन्धी कसूरमा अनुसन्धान अघि बढाएको जनाएको छ। उनलाई मकवानपुर जिल्ला अदालतबाट चार दिनको म्याद अनुमति लिई हिरासतमा राखी अनुसन्धान भइरहेको छ।

मकवानपुर । मकवानपुरको बागमती गाउँपालिका गाउँपालिका वडा नम्बर ७ बाख्रे गाउँमा आगलागीबाट एक घर जलेर पूर्णरूपमा नष्ट भएको छ। आगलागी सगर थोकरको घरमा भएको हो। घटनाको जानकारी पाएपछि बागमती गाउँपालिकाका अध्यक्ष सर्केश घलानसहितको टोली घटनास्थलमा पुगेर तत्काल राहत सामाग्री वितरण र अस्थायी बसोबासको व्यवस्था मिलाएका छन्। अध्यक्ष घलानले आगलागीपछिको अवस्था बुझेर पीडित परिवारलाई तत्कालका लागि आवश्यक सहयोग पुर्‍याइएको सामाजिक सञ्जाल फेसबुकमार्फत जानकारी दिएका छन्। आगलागी हुनुको कारण र क्षतिको पूर्ण विवरण भने आउन बाँकी रहेको छ। स्थानीयवासीको समन्वयमा आगो नियन्त्रणमा लिइएको थियो।